السبب الرئيسي اللي خلاني أكتب البلوج دة اني قرأت بعض البلوجات لبنات مثلية ولاحظت ان الناس مستائين أوي انها كاتبة بلوج ومش قايله حتى هي مين بتكتب عن حاجة فيها جواها و حاسة بيها بس عجزت عن مقاومتها و الناس عمالين يهنوها و يشبهوها بالعاهرات!
اني لا أجاهر بصوتي وأقول ان السحاق حلال و لازم تتقبلوني كوني كذلك ,,ولكن المشكلة الرئيسية ان المجتمع بيعتبرهم كفار و في النار وانهم مجرمين !!
أولا هناك فرق بين السحاق واللواط و الشيوخ أجمعوا على كدة
دة حاجة و دة حاجة و لا يوجد أي علاقة بين الاتنين وبالرغم اني سحاقية بس انا لا أعتبر ان اللواط ده حاجة كويسة وأعتبره جريمة كمان لان عرش الرحمن بيتهزله ولأن درجة حرمته ذكرت في القران!
ولأن اللواط بتضمنه أماكن محرمة اصلا حتى بين الرجل و المرأة وحتى في القران ذكر عن جريمة اللواط أما السحاق لم يذكرغير في قوله
" و اللاتى يأتين الفاحشة من نسائكم فاستشهدوا عليهن أربعة منكم فإن شهدوا فأمسكوهن فى البيوت حتى يتوفاهن الموت أو يجعل الله لهن سبيلا ( 15 ) و اللذان يأتيانها منكم فآذوهما فإن تابا و أصلحا فأعرضوا عنهما إن الله كان توابا رحيما (16 وقال في الاخر والله تواب رحيم أظن ممكن تشوفوا الفرق بين الايتين تدل ان الاتنين ماينفعش نقارنهم ببعض, بعض الأحاديث الحسنة حتى غير صحيحة
دة زاثد كمان ان لكل جريمة من الجرائم اللي حرمها الله تحريم شديد لها حد ,يعني حد السرقة قطع اليد,حد الزنا 80 جلدة,حد اللواط يقفوا عند سور ويتهد عليهم ...ووو ..أما السحاق فليس له حد أساسا!!!!
ومع ذلك مازلت لا أقول ان السحاق حلال ,هو غير حلال و لكن مش بحرمة اللواط والجرائم الأخرى!!! يعني أنا بدعي الله ان يهديني ان شاء الله بس ده مش معناه ان الناس تعتبرني عاهرة عشان كدة!
أ صل السبب اللي مخلي المجتمعات العربية من ضمن دول العالم الثالث لأن طريقة حياتهم و حكمهم على الناس طريقة بهيميه معتمدة على العادات و التفاليد بشكل اساسي وليس لها الا علاقة بسيطة أوي بالدين !!
بمعنى ان الله سبحانه وتعالى أنعم على أمتنا العربية بنعمة الإسلام و هو دين الكمال يعني لو كنا بنطبق قواعد الدين الاسلامي زي مانزل بالضبط ماكانش بأة ده حالنا
ولكن مع الأسف نحن أمة ماشية حسب هواها (الا من رحم ربي) بناخد اللي يعجبنا ونسيب اللي مش عاجبنا ودة ربنا اتكلم عن الناس دة في القران كتير يعني, قسم منهم يحلل ما حرم الله و يحرم ما حلله و القسم التاني بيقسم المحرمات
لجزئين
1_ جزء عادي ومش مشكلة اننا نعمله مع انه بيكون في لعن وطرد من رحمة الله ووعيد و حد
2_ جزءشديد الحرمةو مع ان ممكن تكون محرمات بنفس درجة الجزء الأول أو حتى أقل منها في الخطورة بيعتبروهم مجرمين ولازم يتقتلوا عشان الدنيا تخلص من شرهم !!يعني من الاخر هواهم هو اللي بيحدد اذا كان درجة الحرمة حرام اوي ولا نص نص
يعني الخمر اللي ربنا حرمها مرات عديدة في القران و لعن الله شاربها .وساقيهها و حاملها ووو (راجع الحديث) ولعن يعني طرد من رحمة الله و مع ذلك عادي أن الناس يشربوه ويجيبوه في الأقلام و الأغاني أكننا خواجات بنعيش عليه زي المية مع ان حد الخمر ثمانين جلدة دة بالإضافة الى ضربه بالجريد و النعال أربعين مرة بس انه اصبح عادي لكن أول اما عملوا فيلم حين ميسرة بس عشان مشهد مثلية حتى ما كانش فيه اي تفاصيل عملوا حكاية وان مصر فسدت , هي جت على ده يعني اللي افسدت مصر؟
و لا التدخين ما هو حرام قياسا بقوله ولا تلقوا بأيديكم الى التهلكة وبقوله ( ويحرم عليهم الخبائث) ومع ذلك الناس معنبرينها حاجة حلال و بقيت من الضروريات
ونتف الحواجب قول الرسول فيما معنا (لعن الله الناتفات ) و مع ذلك مافيش واحدة في مصر مش يتنتف الا من رحم ربي و الموضوع عادي
نيجي لأكبر الكبائر وهو الزنا لمافيه من اختلاط انساب و اضرار كثيرة في المحتمع و امراض
ربنا حرمه على الجنسين و الاتنين ليهم نفس العقوبة في الاسلام و مع ذلك في بلادنا العربية و خاصة في مصر الولد عادي انه يصاحب واحدة و يزني معاها اويصاحب بنات كل يوم و اهله يكونوا عارفين ومع ذلك يقولك يلا مسيره يكبر و يعقل .عارفين ليه ؟ عشان ما بيبانش عليه ..لكن البنت لو عملت الجريمة ده أو حتى بس صاحبت ولد فقط للزواج به ده تكون مصيبة لأن ماحدش هيرضى يتجوزها و هتتضطر تقعد في قرابيزهم و تعنس و الناس هيتكلموا عليهم بــــــــس هو ده اللي مزعلهم أوي مش عشان يعني ربنا نهى عنه و لا حاجة
اللي هو يإما تكونوا أمة اسلامية بجد و تكنوا ضد كل ما حرم الله و مع كل ما حلله أو ماتعملوش فيها بأة شيوخ و انتوا بتحرموا اللي على مزاجكم وبتحللوا اللي على مزاجكم
وفي النهاية يعني كلنا بشر وكلنا بنغلط فمش معنى اني مش قادرة ابعد عن عادة معينة زي اللي مش بيعرف يبطل السجاير و اللي مش بتعرف تتحجب او مش بيعرف يبطل الكحول والميسر و بيقولولك على كل ده حرية شخصية طيب ماهو اختيار الشخص اللي بنرتاح معاه برضه حرية شخصية ولا هو بس كلام حسب الكيف وخلاص!
وربنا يغفرلنا كلنا ويرحمنا